الشهر يمضي ماتقل غير يوميـن
واليوم مثل الساعه اصبح حسابه
القلب غافل واكثر الناس لاهيـــن
ماحسّبوا والوقت فيه انقلابـــــــه
دنيا تقلب كنها أرماشت العيـــن
شوفو طريق الدين وامشوا صوابه
وش عاد لو عندك أبيوت وملاييــن
ماينفعك والدّين صكّيت بابـــــه
الموت مايرحم شباب ومسنّيـــن
مات الرسول ومات كل الصّحابه
العمر فاني واكثر الناس سالين
سالين بين الغشمره والدعابــه
احدٍ على تويتر على الزّين والشّين
واحدٍ على الواتس آب ماحدٍ درابه
واحدٍ على البالرنقو اصحابه الفين
يملك غرف للدردشه والكتابـــه
مابين نسخ ولصق يرسل عناوين
لين الجهل والغي ضيّع شبابــه
واحدٍ مشى في هالبرامج على الزين
يرسل رسايل دين والخير جابــه
نصيحتي قدمتها للفهيميــــــــن
قدمتها والعبد يعرف صوابـــــه
مايحس بالرّاحه غير المصليــــن
يامسلمين الله خافوا عذابــــه
خلوا مماشيكم على الخير والدين
قبل القبر ينسف عليكم ترابـــه